Petrit “Patrick” Dobroshi (10-0-1, 2 KOs), i cili garon në kategorinë gjysmë të rëndë, do të zhvillojë duelin e tij të 12-të si profesionist përballë 19-vjeçarit nga Letonia, Arturs Kulikauskis (3-1-1, 2 KOs) në një duel prej 6 rundash, ndërsa Gjetan Keta (3-1, 3 KOs) që bokson në kategorinë e mesme do të zhvillojë një duel prej 4 rundash përballë një kundërshtari, emri i të cilit nuk është bërë akoma publik.

Dobroshi ka zhvilluar dhe ka fituar përballjen e tij të fundit në janar të këtij viti dhe vazhdon që të ndërtojë karrierën e tij për të synuar një luftë për ndonjë titull ndërkombëtar, ndërsa për Ketën ky do të jetë një rikthim në ringun e boksit profesionist pas një pauze prej mëse 20 muajsh. Së fundmi ai kishte pësuar humbje nga austriaku me prejardhje ganeze Omar Jatta (7-5-1, 4 KOs) në një duel të zhvilluar “Color Line Arena” të Hamburgut në korrik të 2008-tës.

Dueli kryesor i kësaj mbrëmjeje do të jetë ai mes kubanezit Yuriorkis Gamboa (17-0, 15 KOs) aktualisht kampion bote (WBC) për peshën “pupël” i cili do të mbrojë titullin përballë argjentinasit të pamposhtur Jonathan Victor Barros (28-0, 16 KOs).

Përballje tjetër e rëndësishme e kësaj mbrëmjeje është ajo  mes rusit Denis Bakhtov (32-5, 21 KOs) dhe gjermanit Steffen Kretschmann (14-1, 13 KOs), një duel i dytë mes këtyre boksierëve pasi vitin e kaluar Bakhtov kishte fituar përballjen e parë.

Edhe ish-kampioni sfiduesi i titullit botëror, kubanezi Juan Carlos Gomez (44-2, 35 KOs) është paraparë që të zhvillojë një përballje në këtë mbrëmje.