Boksieri shqiptar i kategorisë së rëndë, Arnold Gjergjaj, që në ringun profesionist njihet me nofkën “The Cobra”, do të jetë pjesë e mbrëmjes “Cosa Nostra” që organizohet të shtunën më 19 dhjetor në Basel të Zvicrës.

Ai do të jetë protagonisti i vetëm profesionist i mbrëmjes gjatë së cilës do të zhvillohen edhe disa përballje të boksit amator dhe që fillojnë prej ores 20:30.

Kundërshtari i Gjergjajt në këtë përballje nuk është caktuar akoma, por kjo gjë pritet që të bëhet në ditët në vazhdim.

25-vjeçari Gjergjaj, disa herë kampion i Zvicrës në boksin amator, ka debutuar si profesionist në gusht të këtij viti dhe deri më tani të dyja përballjet që ka zhvilluar i ka fituar me KO.

Në Zvicër ai konsiderohet një talent i jashtëzakonshëm dhe mendohet që shumë shpejt të ngritet në nivele të larta të boksit  profesionist evropian.

Së fundmi ai ishte protagonist i mbrëmjes së zhvilluar në Kirchberg të Zvicrës sëbashku me Sefer Seferin në një organizim të vëllezërve Seferi.