Klitschko e mbante larg Sosnowskin në rundin  e parë. Edhe në të dytin ishte ukrainasi ai që kontrollonte situatën. Sosnowski arrin që të realizojë disa goditje në rundin e tretë. I katërti ishte një tjetër rund i dominuar nga Klitschko që gjithnjë punonte më shumë. Ukrainasi filloi që të hapet në rundin e pestë duke ndëshkuar boksierin polak. Një tjetër rund i Klitschkos ishte ai i gjashti, por Sosnowski vazhdonte të mbante veten në lojë. Në të shtatin vazhdon dominimi i Klitschkos por Sosnowski arrin që t’i revanshohet me goditje në disa raste. Është polaku që lëshon një goditje të mirë me të djathtën në rundin e tetë.

Klitschko realizon më të mirën në rundin e nëntë, duke realizuar goditje të shumta të forta, ndërsa në të dhjetin shkon për goditjen përfundimtare duke rrëzuar kundërshtarin në këndin e ringut. Gjyqtari Jay Nady menjëherë bëri me shenjë për ndërprerjen e duelit për të mos lejuar ndëshkimin e mëtejmë të Sosnowski që kishte sytë e enjtur nga goditjet e pësuara.

Kjo ishte mbrojtja e katërt e titullit të kampionit për Vitali Klitschkon. Tani ai kërkon që në sfidën e radhës të ndeshet me pronarin e titullit botëror në versionin WBA, David Haye. Për një duel me anglezin kampion bote është edhe vëllau i ri i Vitalit dhe njëherit kampion bote në versionet IBF dhe WBO, Vladimiri.

Një tjetër alternativë për ndeshjen e radhës të Vitali Klitschko është edhe gjigandi rus Nikolai Valuev.