Green ka qenë më agresiv që nga gongu i parë duke realizuar një kombinim solid me dy goditje me të majtën dhe një të djathtë për ta rrëzuar në dysheme amerikanin, i cili pavarësisht se u ngrit për të vazhduar luftën, nuk arriti që të kundërpërgjigjet furisë së australianit.

Gjyqtari Howard Foster e ndërpreu duelin vetëm 58 sekonda para përfundimit të rundit pasi ishte e qartë se nuk ishte më në gjendje që të mbrojë veten.

Pas përfundimit të duelit Green ka falemnderuar ekipin e tij që e kanë ndihmuar për të shënuar fitoren e tij më të rëndësishme në ring.

“Ai është një prej boksierëve më të mirë të të gjitha kohërave dhe e falemnderoj për mundësinë që më dha të boksoj me të në Australi. Falemnderit Roy Jones Jr”, ka thënë Green pas duelit.

“Gati ndjehem keq për këtë që kam bërë. Kjo gati më ka lënduar që t’ia bëj këtë dikujt të cilin e shikoj për model si brenda ashtu edhe jashtë ringut. Ai është një legjendë e vërtetë”, ka shtuar ai.

Humbja e pësuar për 40-vjeçarin Jones vë në dyshim edhe planet për një revansh të mundshëm me veteranin tjetër Bernard Hopkins. Vetë Jones nuk ka kërkuar asnjë justifikim për humbjen e cila mund të sinjalizojë fundin e karrierës së tij.

“Nuk dua të kërkoj asnjë justifikim, ishte një performancë e jashtëzakonshme nga Danny”, ka thënë Jones.