Boksi do të hapë një kapitull të ri me një sistem të ri garimi që padyshim pritet të shtojë interesimin e publikut . Brenda dy viteve të ardhshme do të zhvillohet një turne me gjashtë boksierë, që të gjithë kampionë të peshës "super te mesme". Do të jenë Arthur Abraham (kampion aktual i botës për peshën e mesme, versioni IBF), Carl Froch (kampion bote në peshën super të mesme, versioni WBC), Mikkel Kessler (kampion bote në peshë super të mesme, versioni WBA), Jermain Taylor (ish-kampion bote, aktualisht i 5-ti në peshën super të mesme), Andre Ward (kampion i Amerikës Veriore në peshën super të mesme) dhe Andre Dirrell (i gjashti në kategorinë super të mesme).

Pasi që të gjithë këta kanë rënë dakord që të jenë pjesëmarrës të këtij turneu, emri tjetër për të cilin organizatorët po bëjnë përpjekje ta bindin që të marrë pjesë është Joe Calzaghe, i cili kohë më parë hoqi dorë nga brezi i kampionit të IBF për peshën 76.2 kg (super e mesme) për t'u pensionuar.

"Luhet" për 50 milionë dollarë

Akoma po zhvillohen intenzivisht negociatat mes promoterëve, federatave dhe kanaleve televizive për zhvillimin e këtij mega-evenimenti. Organizatori kryesor i këtij eventi është televizioni amerikan me pagesë “Showtime”, ndërsa partner në Gjermani do të jetë ARD.
“Shuma për fituesin do të jetë 50 milionë dollarë”, ka thënë promoteri i Abraham, Wilfried Sauerland për të përditshmen gjermane «Bild».
Kështu do të zhvillohet gjithçka: Secili nga tre boksirët evropian (Abraham, Kessel dhe Froch) do të ndeshet me secilin nga tre boksierët amerikanë (Taylor, Ward dhe Dirrell), duke zhvilluar kështu secili nga tre duele.

Sistem i thjeshtë

Një fitore me KO në një ndeshje i jep tre pikë boksierit, ndërsa fitorja me vendim të gjyqtrëve vlerësohet me dy pikë. Barazimi vlen një pikë. Katër boksierët që kanë grumbulluar më së shumti pikë kualifikohen për në gjysmëfinale, dhe fituesit e gjysmëfinaleve do të përballen më së largu deri në maj të vitit 2011 në një finale të madhe të kategorisë super të mesme. Fituesi i kësaj finale do të rrëmbejë sipas të gjitha gjasave brezat e versioneve WBC dhe WBA, por mund të ndodhë që edhe dy titujt e tjerë të diskutohen në këtë përballje.
Sipas atyre që njoftojnë mediat gjermane pritet që 10 dhjetor të këtij viti të fillojë turneu me përballjen e parë mes Arthur Abraham dhe Jermain Taylor në Gjermani.

Një ëndërr që bëhet realitet

Paralelisht me përballjen mes Abraham e Taylor, kampioni aktual i WBC, Carl Froch, do të zhvilojë duelin e parë në SHBA përballë pariotit të tij, Andre Dirrell. Ndeshjet vazhdojnë me përballjen e Andre Ward me kampionin aktual të WBA, danezin Mikkel Kessler.
Për Arthur Abraham kjo është një ëndërr e bërë realitet.
"Është një kalim i imi i madh në kategorinë super të mesme. Një ëndërr, prej të cilës do të zgjohem me dy tituj të kampionit", ka thënë ai për “Bild”.