INTERVISTË EKSKLUZIVE ME BOKSIERIN - SEFER SEFERI
Një ndër yjet e rinj të ringut profesionist shqiptar, Sefer Seferi (6-0-0, 5 KO’s) do të tentojë që të vazhdojë bilancin e tij të qindpërqindtë të fitoreve si profesionist teksa do të paraqitet para publikut prishtinas në kuadër të “Kosova Fight Night” më 18 prill kur do të ndeshet me kroatin Ivica Cukusic.
Seferi po ndjek me shumë sukses hapat e vëlllaut të tij Nuriut, dhe pritet që në vitet në vazhdim të thotë edhe ai “fjalën” e tij në kategorinë “cruiser”.
Seferi flet për duelin e radhës dhe planet për të ardhmen në këtë intervistë ekskluzive për “boxalb.com”.

Keni një kundërshtar me mjaft përvojë si Ivica Cukusic, çfarë dini për të?

Seferi: Kundërshtari im është vërtet një boksier me shumë përvojë, por kjo nuk do të thotë që unë frikësohem.
Madje kjo gjë më motivon akoma më shumë për të shënuar fitore.

Si kanë shkuar përgatitjet për këtë duel?

Seferi: Përgatitjet deri tani kanë shkuar shumë mirë, dhe shpresoj që me 18 prill do të jem në një formë të shkëlqyer.

Ndihma e vëllaut Nuriut do të ndikojë për të motivuar akoma më shumë. Si e vlerson ai rëndësinë e ketij dueli dhe cilat janë ndihmat dhe këshillat e tijë për duelin e 18 prillit?

Seferi: Nuriu ka qenë prezent gjatë kohës përgatitore dhe ai njëkohësisht është edhe trajneri im.
Prezenca e tijë si trajner në këndin tim është gjithë një ndihmë për mua.

Çfarë mbresash u kanë mbetur në kujtesë nga përballja në Shkup para publikut shqiptar, si janë çastet kur ngjitesh në ring para publikut shqiptar dhe cilat janë kujtimet prej dueleve të tilla?

Seferi: Për ne ishte hera e parë që boksonim në vendlindje, dhe më besoni emocionet ishin të pashpjegueshme, dhe unë jam shumë i lumtur që edhe këtë herë boksoj në Kosovën e lirë dhe të pavarur.

Tani do të provosh edhe ringun e Prishtinës,çfarë ju shkon nëpër mend?

Seferi: Mua në këtë ndeshje nuk më ndjekin vetëm shqiptarët e Prishtinës por të gjithë shqiptarët e diasporës, dhe shpresoj që t'i gëzoj të gjithë fansat e mi me një fitore.

Si ndiheni që përveç kënaqësisë që do t'i dhuroni publikut prishtinas, do të ndihmoni edhe fëmijët në nevojë pasi spektakli ka edhe karakter humanitar?

Seferi: Është pikërisht kjo arsye që mua më motivon më tepër që të vij në Prishtinë dhe jam i sigurtë që do mbetet një eveniment i veçantë në jetën time.

Cilat janë planet e Seferit pas duelit të 18 prilit?

Seferi: Planet e mia janë që në këtë vit të zhvilloj 4 deri 5 ndeshje dhe shpresoj që në vitin  2010 të ndeshem për ndonjë titull internacional.
Një falenderim i veçantë shkon edhe për redaksinë tuaj.

11.04.2009