INTERVISTË EKSKLUZIVE ME BOKSIERIN SHKODRAN-ERJON ZEKA
27-vjeçari Erjon Zeka (Zhega) që ka një bilanc prej 6 fitoresh dhe 1 humbjeje në ringun profesionist rrjedh nga një familje me traditë sportive nga Shkodra.
Babai i tij është njëkohësisht arbitër i boksit dhe është nipi i ish-trajnerit të kombëtares shqiptare në futboll, Medin Zhega.
Erjoni ka rreth tre vite e gjysmë që jeton në Austri, ku studion dhe stërvitet gjithashtu. Gati po bëhet një vit që nga dueli i tij i fundit ku kishte mposhtur në Vjenë hungarezin Istvan Zeller dhe Zeka premton që së shpejti do të rikthehet!

Kur keni filluar boksin dhe cili është rekordi yt si amator, sukseset?

Erjon Zeka: Boksin e kam nis që në moshën 13-vjeçare, në qytetin e Shkodrës, kuptohet në klubin me traditë sportive Vllaznia. Si amator kam qenë 5 herë kampion i Shqipërise, kam dalë nënkampion ballkanik në Mostar të Bosnjes, kam pasur pjesëmarrje të shumta në aktivitete të ndryshme ndërkombëtare si përfaqësues i kombëtares shqiptare. Kam qenë fitues i disa medaljeve në nivel ndërkombëtar.
Në një përmbledhje të përgjithshme kam realizuar rreth 50 ndeshje si brenda dhe jashtë vendit, ndeshje të cilat në pjesën më të madhe i kam fituar.

Ka kaluar gati një vit nga dueli yt i fundit. Kur do të rikthehet Erjoni përsëri në ring?

Erjon Zeka: Që nga ndeshja me sukses para një viti kam qenë jashtë ringut për arsye objektive, studimesh, kohe dhe ndërrim trajnerësh! Ajo që vlen të përmendet është se unë kam qenë në kontakt të vazhdueshëm me sportin gjate vitit që lamë pas. Mendoj që kthimi im në ring do të realizohet në një të ardhme shumë të shpejtë. Shpresoj që viti 2009 do të jetë viti i kthimit tim së bashku me  suksesin.

Sa larg pretendon të arrijë Erjoni në ringun profesionist?

Erjon Zeka: Ëndrrat janë nga më të shumtat, dhe qëllimet e mia janë për të shfaqur një boks cilësor, dhe së bashku të arrijmë dhe të sjellim një kampion të madh më shumë në Shqipëri! 

Cili është idhulli yt ne boksin profesionist?

Erjon Zeka: Idhulli im në boksin profesionist është boksieri legjendar i dekadës së fundit Oscar De La Hoya.

Me cilin boksier të kategorisë tënde do të dëshiroje të përballeshe?

Erjon Zeka: Pikërisht atë që e ceka më lart. Ndeshja e ëndrrave të mia do të ishte një ndeshje kundër legjendës, De La Hoya. Do të mjaftonte vetëm ta ndash ringun me një boksier siç është Oscar De La Hoya.

Ju ushtroni së bashku me Shpëtim Shalën si janë marrëdhëniet mes jush?

Erjon Zeka: Ne njihemi qysh nga kohërat kur unë e kam përfaqesuar Shqipërinë dhe Shpëtimi Kosovën në boksin amator dhe fatmirësisht arritëm të takoheshim përsëri në Austri me të njejtin qëllim, pra boksin. Marrëdhëniet mes nesh janë shumë të mira, e përkrahim dhe e ndihmojmë njeri tjetrin gjatë përgaditjeve të ndeshjeve që zhvillojmë.

Cili është trajneri dhe menaxheri juaj?

Erjon Zeka: Trajneri im është legjendari austriak Josef Kovarik, me të cilin bashkëpunojmë qe një kohë të shkurtër, mirëpo në mënyrë të përkryer. Menaxher e kam bashkatdhetarin dhe njëkohësisht mikun tim Shpëtim Redo, i cili ka një rol shumë të madh në karrierën time. Mbështetja e tij është gjithnjë evidente.
 

Në fund a keni  edhe diçka për të shtuar?

Erjon Zeka: Në fund ju falemnderohem juve si Boxalb. E kam përcjellur punën tuaj, po bëni një punë të mrekullueshme, vetëm vazhdoni kështu.

12.01.2009