Kur kishin mbetur edhe 26 sekonda deri në përfundim të rundit të dytë, trajneri i boksierit maqedonas ka hedhur peshqirin në ring për të sinjalizuar dorëzimin e duelit. Para kësaj Jovanovski ishte gjetur disa herë në vështirësi pas kombinimeve nga ana e Visokës.

Visoka e ka shfrytëzuar këtë përballje në kuadër të përgatitjeve që po bën për një duel revanshi me hungarezin Gabor Halasz, nga i cili ishte mposhtur në prill të këtij viti.

“Nëse do të jetë e mundur do të zhvilloj edhe disa duele për të arritur formën optimale para revanshit me Halasz. Nuk e di sa do të jetë e mundur kjo pasi qenka e vështirë që të bësh vetë organizatorin, vetë menaxherin, vetë sponsorin e gjithë organizimit dhe në fund të ngjitesh edhe vetë në ring”, ka thënë Visoka për “boxalb.com”.

“Me këtë rast dua të falenderoj trajnerin Isuf Brajshori, me të cilin kam punuar gjatë kohës së përgatitjeve për këtë përballje. Gjithashtu dua të falenderoj edhe mikun tim Bashkim Shala, pa të cilin zhvillimi i kësaj ndeshjeje do të ishte i pamundur”, ka shtuar ai.